Pedagogia Topaketa hau Alfonso Elorriaga pedagogo, ikertzaile eta abesbatzen zuzendariarekin batera proposatzen dizuegu. Alfonsok “Kantu koralaren didaktika nerabezaroan: ahotsaren muda musika gelan” («Didáctica del canto coral en la adolescencia: la muda de la voz en el aula de música») ikastaro interesgarria eskainiko digu. Gainera, Barakaldoko Schola Cantorumeko Gazte Abesbatzak parte hartuko du abesbatza pilotu gisa eta Barakaldoko Udal Kontserbatorioko ikasleen laguntza izango dugu.
- Ikastaroa Barakaldoko Udal Musika Kontserbatorioan izango da, 2025eko azaroaren 23an.
- Ordutegia: Azaroak 23, igandea, 10:00etatik 14:00etara eta 15:30etik 17:30era.
Matrikula zabalik plazak bete arte:
| E.H.-ko Abesbatza Federatuetako koralistak.* | E.H.n FEDERATU GABEKO koruetako koralistak. | |
| MATRIKULA | 45 € | 60 € |
*Beharrezkoa da zure abesbatza federatuko kide dela ziurtatzen duen agiria aurkeztea.
Matrikula formularioa: eman izena formulario hau betez.
Alfonso Elorriaga:
Madrilgo Unibertsitate Konplutentseko Hezkuntza Fakultateko irakasle eta International Journal of Research in Choral Singing zientzia-aldizkariko argitaratze-kontseiluko kide iraunkorra da. Aldizkari hori Ipar Amerikako Abesbatza Zuzendarien Elkarteak argitaratzen du, eta, 2024ko irailaz geroztik, ISMEk argitaratzen duen Musika Hezkuntzako Nazioarteko Aldizkariko kide ere bada. 2017az geroztik, ANECAk Unibertsitate Pribatuko Irakasle Kontratatu Doktore eta Irakasle Titular gisa akreditatzen du.
2008. urteaz geroztik, Ciempozueloseko (Madril) F. Puerta BHIko “Voces para la convivencia” proiektu korala zuzentzen du. Proiektu horrekin, hainbat abesbatza lehiaketa irabazi ditu (bost aldiz Madrilgo Erkidegoko eskolarteko abesbatzen lehiaketako 1. bikaintasun saria, bi aldiz Espainiako Hezkuntza Ministerioko eskola-abesbatzen 1. sari nazionala, Torreviejako gazteen nazioarteko habaneren 1. saria, etab.), hainbat erakunderen hezkuntza-aitorpenez gain. 2022ko azaroan, Ciempozueloseko Udalak bere izena eman zion herriko gaztetxeari, musika hezkuntzaren bidez udalerriko gazteekin egindako gizarte lana aitortzeko.
Madrilgo RCSMn Musika Pedagogiako titulua eskuratu zuen, eta abeslari eta hezitzaile gisa hiru urtez luzatu zuen bere prestakuntza Madrilgo Erkidegoko Irakasleen Koruan. Ondoren, Salzburgoko Orff Institutuan musikaren eta dantzaren pedagogiako graduondokoa egin zuen. Azkenik, UAMen doktoratu zen, Enrique Muñozek zuzendutako tesi batekin, nerabezaroko kantu koralari buruz. Gaur egun, gai hori ikertzen jarraitzen du, eta artikulu eta liburu ugari argitaratu ditu, horietako batzuk Patrick Freer (GSU) lankide eta lagunarekin batera. Madrilgo Unibertsitate Autonomoan eta UNIR unibertsitatean irakasle elkartua izan da, azken honetan musika graduko eta musika ikerketako masterreko zuzendari akademiko bezala. Madrilgo Erkidegoko Haur eta Gazteen Koruko zuzendari laguntzailea eta UAMeko koruko bitarteko zuzendaria ere izan da. Hizlari gonbidatua izan da musika hezkuntzari buruzko 75 ikastaro eta mintegitan baino gehiagotan Espainian eta atzerrian, eta epaimahaiko kide ere izan da zenbait abesbatza lehiaketatan.
Duela urte batzuetatik hona, Alfonsok Isabel Villagar irakaslearekin hasi zuen ahots-prestakuntza, eta zarzuela errezitaldi bat eskaini zuen Madrilgo Musika Liburutegian. Gaztetan, genero hori landu zuen A. Amengualek zuzentzen zuen Espainiako konpainia lirikoaren abesbatzan. Duela gutxi, Carlos Guastavinoren abestien grabazio bat kaleratu du Federico Lechner pianojotzailearekin batera.
Edozein kontsulta egiteko, idatzi helbide honetara: kaixo@eae.eus