Koru Zuzendaritza Akademiaren hurrengo Ate Irekien Egunerako, Alaitz Urkiaren presentzia eta esperientzia izango ditugu gurekin. Jarraian, bere ibilbide musikal eta akademiko oparoa ezagutzera gonbidatzen zaitugu.

Musika-prestakuntza

Alaitz Urkiak Hondarribiko Musika Eskolan hasi zituen musika eta piano ikasketak, eta Irungo Kontserbatorioan jarraitu zituen. Ondoren, Musika Hizkuntzaren Pedagogiako gradua egin zuen Musikenen, Euskal Herriko Goi Mailako Musika Kontserbatorioan. Gainera, 2003. urteaz geroztik, zuzendaritza koraleko zenbait ikastaro egin ditu. Ikastaro horietan Gabriel Baltés, J. Duijck, M. Schmidt, V. Negreiros, J.L. Martínez, J.L. Tárrega, Maite Oca, Basilio Astúlez eta Xabier Sarasola irakasleekin lan egiteko aukera izan du, besteak beste.

Irakaskuntza-esperientzia

Gaur egun, musika hizkuntza eta abesbatzako irakaslea da Donostiako Francisco Eskudero Kontserbatorioan. Bere ibilbidean zehar, musika-hizkuntza eta pianoko irakaslea ere izan da Gasteizko Jesus Guridi eta Bilboko Juan Crisostomo de Arriaga kontserbatorioetan.

Zuzendaritza Korala eta Abeslari-esperientzia

2006tik aurrera, irakasle aritzearekin batera, hainbat abesbatza zuzendu ditu Elgoibar, Deba eta Bergaran. Gaur egun, Irungo Náyade Abesbatzaren zuzendaria da. Gainera, abesbatza elkarteek eta Euskal Herriko nahiz Gipuzkoako Abesbatzen Federazioek eskaintzen dituzten tailerretan kolaboratzen du eta zuzendari ere aritu da.

Abeslari gisa, Javier Bustok zuzendutako Kanta Cantemus Koroa abesbatzako kidea izan da, bai eta Oñatiko Ganbara Abesbatzarena ere, Esteban Urzelai eta Aitor Biain zuzendarien esanetara. Gaur egun, Gabriel Baltések zuzendutako KUP Taldea eta Basilio Astulezek zuzentzen duen Vocalia abesbatzetako kidea da.